Helpwch ni i gofnodi enwau lleoedd sydd ddim yn ymddangos ar fapiau digidol

Rydyn ni am wneud yn siŵr bod cynifer o enwau lleoedd yng Nghymru â phosib yn cael eu casglu a’u rhannu, er mwyn iddyn nhw gael eu defnyddio nawr a chan genedlaethau’r dyfodol. Cyn dechrau, cymerwch funud i ddarllen ein Polisi Preifatrwydd er mwyn deall sut caiff eich data ei ddefnyddio.

Mae nifer o enwau Cymraeg a hanesyddol yn bodoli sydd ddim yn ymddangos ar fapiau ar-lein ar hyn o bryd. Gall y rhain fod yn enwau ar gyfer:

• mynyddoedd a bryniau
• nentydd a rhaeadrau
• caeau a nodweddion amaethyddol
• nodweddion tirweddol eraill
• tai
• busnesau
• pontydd
• hen felinau, gweithfeydd neu ffatrïoedd
• adfeilion

Os oes gennych enwau ar gyfer y rhain, neu unrhyw elfennau eraill yn ein hamgylchedd naturiol, tirweddol neu adeiledig, gallwch helpu drwy ddefnyddio’r ffurflen ar-lein hon i’w cofnodi. Byddwn yn rhannu’r wybodaeth gyda Wicipedia, Mapio Cymru / Open Street Map, a’r Rhestr o Enwau Lleoedd Hanesyddol, fel bo’r enwau’n ymddangos ar gymaint o adnoddau â phosibl, gan annog gymaint o bobl â phosibl i’w defnyddio.

Gallwch ein helpu i gofnodi enwau lleoedd drwy lenwi’r ffurflen isod. I wneud hynny:

1. Dewch o hyd i’r lleoliad lle dylai’r enw fod ar y map. Gallwch chwyddo’r ardal a symud o gwmpas gan ddefnyddio’ch llygoden neu’r botymau ar ochr dde y map.
2. Cliciwch ar y map unwaith i ddewis lleoliad yr enw yr hoffech ei ychwanegu. Os yw’r enw’n gysylltiedig ag ardal eang neu nifer o leoliadau (e.e. coedwig), ceisiwch leoli’r pwynt tua chanol y lleoliad.
3. Llenwch y meysydd gwybodaeth sy’n dilyn. Mae meysydd gyda * arnynt yn rhai gorfodol.
4. Cliciwch ar Cyflwyno.

Lanlwytho ffotograffau

1. Os hoffech, gallwch gynnwys ffotograffau o’r man rydych yn ei gofnodi.
2. Peidiwch â thynnu llun sy’n cynnwys pobl.
3. Os ydych yn lanlwytho ffotograff sy’n cynnwys eiddo rhywun arall, rhaid i chi gael eu caniatâd yn gyntaf.
4. Gwnewch yn siŵr fod lluniau’n cael eu tynnu o fan cyhoeddus, sydd â hawl tramwy cyhoeddus, neu gyda chaniatâd y perchennog.
5. Os oes gennych rywbeth a allai helpu i ddangos graddfa (e.e. bag, ffon gerdded, potel ddŵr ac ati), gosodwch ef yn y ddelwedd, gan wneud yn siŵr nad yw’n gorchuddio rhywbeth pwysig.