Mae'r cysyniad o Lwybr Coedwig Cymru yn rhan o ddatblygiad y Goedwig Genedlaethol sy'n rhychwantu Cymru. Bydd Llwybr Coedwig Cymru yn helpu i greu rhwydwaith o lwybrau rhyng-gysylltiedig sy'n rhedeg ar hyd a lled Cymru gan uno safleoedd coetiroedd y Goedwig Genedlaethol.

Yr uchelgais yw y bydd Llwybr Coedwig Cymru yn dod â'r manteision canlynol:

• Cysylltu pobl â choetiroedd a natur gan wella iechyd corfforol a meddyliol;
• Darparu cyfleoedd economaidd a thwristiaeth i fusnesau a grwpiau lleol; a
• Gwella bioamrywiaeth a gwytnwch ein hamgylcheddau coetir trwy sefydlu 'coridorau gwyrdd' a chefnogi lefelau uwch o blannu coed / gwrychoedd lle bo hynny'n briodol.

Bydd adran beilot o Lwybr Coedwig Cymru yn dechrau o Borthceri i Lyn Nedd. Bydd y gwersi a ddysgwyd o gyflwyno'r adran beilot hon yn helpu i lywio'r gwaith o ddatblygu Llwybr Coedwig Cymru ar draws Cymru ymhellach.

Mae lliw’r llwybrau ar y map yn cynrychioli pob adran wahanol o’r llwybr. Nid ydynt yn cynrychioli’r math o lwybr.